「空中女王」 747客機國泰退役

【明報專訊】服役國泰航空37年、有「空中女王」之譽嘅波音747客機，喺9月30號同10月1號完成來回香港同東京羽田機場嘅航班後，將會喺國泰機隊退役。國泰噚日邀請多名曾經喺747客機工作嘅機組人員分享回憶。


機師﹕降落啟德高難度 至今難忘

駕駛過3款747客機、現任航務總經理嘅Mark Hoey話，1980年代加入國泰後，正值公司擴充747機隊嘅時機，形容係開展一個新時代，因為747載客多，燃油效率高，而且航程長，令到唔少人可以飛到更遠嘅地方。佢話從機師角度，駕駛747係好快樂嘅事，雖然機身龐大，但操作上嚟好靈活。佢仲話喺以前啟德機場嘅年代，每次駕駛747客機經過「格仔山」（九龍仔山）降落機場時，都好有滿足感，形容為高難度嘅飛行體驗，到家都好難忘。


加入國泰30年、現職機艙客務經理嘅唐燕芬（Monica）就憶述，自小夢想係環遊世界，於是決定加入國泰任職機艙服務員，一入職就獲編配747長途客機接受訓練，自此見證747嘅變化同改進，估計前後坐過747客機近千次。


國泰747客機退役後，仲有大約20架747貨機繼續服役，而原有747客機所飛行嘅航點，近年已經被波音777同空中巴士A350陸續取代。