趙應春爆料﹕佢叫「橡筋紮住先」 記者那些年 卿姐唔畀人小解

【明報專訊】做咗25年議員嘅民主黨主席劉慧卿，仲有幾日就結束議會生涯，佢噚日就邀請一大班傳媒朋友道別。卿姐做議員前做過15年記者，所以好多傳媒界前輩畀面出席，仲乘機爆料，好似同佢喺無綫做過同事、家係有線電視高層嘅趙應春就話，卿姐當年做採訪主任時言論大膽，叫過佢趕去採訪新聞，仲話尿急就搵橡筋紮住先！


臨別議會 會傳媒友好

卿姐嘅告別宴，有唔少舊同事及朋友分享同佢嘅工作點滴，趙應春話，卿姐好後生就升做採訪主任，當年無手提電話，要好似的士台咁透過無線電聯繫。有次卿姐問外面採訪嘅同事，有無人可以去上水採訪車禍，當時大家想蛇王無人回應，最後係喺香港仔嘅趙應春應機，趙一心諗住唔會安排佢去啦，但卿姐仍叫佢趕去上水，趙應春梗係不滿，發牢騷話尿急要去廁所先！點知卿姐就喺無線電大聲鬧﹕搵條橡筋紮住先！此話一出，所有同事都收聽到，全部O嘴唔敢反駁！


質問梁家榮有無採訪黑名單

不過，現貴為廣播處長嘅梁家榮就講咗另一個版本，話卿姐喺辦公室開會工作，其間有人想去廁所，此時卿姐就發表「橡筋論」。


雖然席間都係賓客，但卿姐繼續不客氣本色，質問在座傳媒高層，包括做過無綫同亞視嘅梁家榮，究竟電視台有無採訪黑名單，佢仲為一眾年輕黨友爭取，問電視台係咪避免訪問民主黨黨員。呢啲理應係嚴肅話題，但大家聽到都拍掌大笑，無辜受靶嘅梁家榮就話唔會有黑名單！


大家關心卿姐嘅退休及感情生活，席間有人爆料，近年成日有人打電話畀卿姐關心佢，卿姐就澄清呢個密友叫Helen，係小學同學，而佢哋兩個本周六仲會結伴遊越南。不過，卿姐話佢工作一定會做到最尾一日，而本周工作仍然密麻麻，臨離任仲印製工作報告落區派發。