劉炳章見一帶一路專員斟商機

【明報專訊】港府唱好一帶一路前景，但大家都似只聞樓梯響。專業聯盟主席劉炳章（PC）就話，今日會同十幾個專業團體代表，同政府新任嘅「一帶一路」專員蔡瑩璧傾吓偈，研究點樣推動專業界人士開拓一帶一路市場。


PC早排先跟財爺曾俊華嘅外訪團去咗哈薩克斯坦考察，佢話亞洲開發銀行會支持當地一啲基建項目，而佢同銀行行長傾過，推介香港建築專業人士，協助工程規劃及監管，因為香港嘅專業服務水平高而且出名，佢話對方都表示可以商討。PC又話，當地都想發展鐵路項目，佢同港鐵主席馬時亨就介紹喺香港成立鐵路學院，可以提供培訓，當地部門都好有興趣，事後即刻向佢哋跟進查詢。


一帶一路雖然好似離地少少，但PC話只要肯去開拓，都可以幫香港業界搵到商機，所以都想搵專員交流吓。PC又大讚蔡瑩璧抵得諗，退休後唔收人工再為政府服務做「無糧專員」，話蔡知道如果要等立法會通過撥款開職位，可能要拖好長時間，所以唔介意捱義氣。