民協莫嘉嫻辭主席 諗吓仲係咪從政

【明報專訊】立法會選舉後又多一個女主席辭職，民協莫嘉嫻（中）前日已提出請辭，並獲中委會通過，現由民協副主席施德來做署理主席。莫嘉嫻去年區選無咗議席，現時連黨主席職位都辭埋，佢同Emily講，家要諗諗未來人生路向，包括仲係咪從政。


民協今次立法會選舉失利，立法會內再無民協代表，莫嘉嫻話自己作為主席應該承擔政治責任，又話自己唔做主席，仍可以喺其他崗位服務，而佢今次亦唔係要離開民協。至於佢個人點樣，莫嘉嫻就話要時間慢慢思索一下。


莫嘉嫻話民協家無咗立法會議席及資源，民協未來嘅路好難行，民協要檢討一下路向，又話組織內有後生仔提出咗一啲檢討意見書，民協會討論一下未來發展。


陳志全做人力主席

另一政團人民力量亦有人事變動，袁彌明喺選舉後辭去主席職位，而人力執委會前日選出該黨立法會議員陳志全出任新主席，任期一年。