PPRB阿頭打黑經驗老 調任元朗指揮官

【明報專訊】近月元朗橫洲的風波一浪接一浪，公眾都關心呢區的鄉紳利益及黑幫問題。Emily聽講有豐富打黑經驗、做過Ｏ記主管嘅警察公共關係科（PPRB）總警司區展秋，將會喺11月調任元朗指揮官，相信人稱「展昭」嘅區sir去到嗰區，一定有經驗同能力鎮住治安大局。


至於PPRB總警司呢個位，就會由家嘅元朗指揮官霍樂生（Ｗilson）坐。霍sir刑事偵緝經驗豐富，曾做過毒品調查科行動組警司、行動部高級警司（特別職務），參與過警方處理佔領行動嘅工作。Emily相信霍sir到任PPRB最大嘅工作項目，都一定係明年7月回歸20周年儀式，點樣喺保安工作上加強警民溝通、警方信息點樣傳遞到畀公眾。


曾偉雄下周起任震雄「戰略官」

另一邊廂，政府公務員事務局網頁近期都公布一批退休警官獲准做外間工作嘅安排，其中前一哥曾偉雄星期一（19日）開始出任震雄集團「集團戰略官」（Chief Group Corporate Strategy），政府批出條款包括要求曾偉雄唔可以使用或披露喺政府任職期間所取得嘅任何機密或非機密資料，包括警方策略、調查、同行動相關嘅資料，一個唔好彩涉及警方要檢控震雄，佢亦唔可以參與。警隊前副處長馬維騄就獲批喺8月中起做恒隆嘅顧問，前助理處長（行動）張德強，亦獲批8月底開始做機場保安嘅助理行政總裁。