官商鄉雲集 梁振英讚鄉局貢獻 侯強評特首：Choking my air

【明報專訊】喺「官商鄉黑合作」嘅爭議聲中，鄉議局噚日舉行慶祝67周年國慶酒會，呢個場合當然係官商鄉雲集，好似中聯辦副主任林武、特首梁振英（CY）、政務司長林鄭月娥同多個局長同台祝酒，一齊切金豬。CY致辭嗰陣講到，多謝鄉議局多年來嘅貢獻，希望日後能夠共商良策。


鄉議局主席劉業強就特別批評，近排有人透過抹黑鄉事博輿論支持，企圖加深城鄉矛盾，係「不負責任」。佢又強調，新界人傳統權益並非特權，係受基本法保障嘅合法權益。


雖然官員同鄉事表面一派和氣，不過被問到點睇政府話橫洲二、三期計劃唔係擱置，會繼續推行，上水鄉委會主席侯志強就話，會「睜大雙眼、刮目以待」政府點樣落實承諾。佢又話，政府唔應該用「摸底」呢類美麗詞語嚟形容會面，笑住話呢啲詞語係用於男女朋友之間嘅關係，話第時應改為初步諮詢、深入諮詢。


侯強又評價CY日前喺記者會上發表「粒粒皆辛苦」言論，素來大口嘅侯強就反問記者，「有一句英文叫choking my air（chok住道氣）你知唔知點解？」但佢就拒絕解釋意思，睇嚟要大家自己解讀一下。