「特首唔好做」 曾主席又改口風？

【明報專訊】立法會主席曾鈺成係熱門特首候選人之一，曾經公開話「想打破悶局」競逐下屆特首嘅曾主席，噚日喺佢主持嘅商台節目《鈺成千里目》話「呢個位（特首）唔好做」，認為「喺比較超然位置搞智庫」，講嘢都方便啲，唔通暗示未必會入局「跑馬仔」？

節目繼續由曾主席訪問自由黨榮譽主席田北俊，田少話曾主席唔係「真退休」，應該「更上一層樓」；曾主席無正面回應，只係答「家咪做緊節目囉」。但田少無咁易放過佢，繼續話「香港需要更和諧嘅特首」，仲話「做特首過癮啲」。


曾鈺成笑笑口話「唔好講呢啲」，又好坦白話過去咁多年坐喺立法會主席個位，「睇住呢班友仔點樣鬧特首，特首企喺度就好似（被）公審咁，我點肯換呢個位」，話「梗係唔制（做特首），呢個位唔好做」。佢之後提到，如果要為香港做事可以開咪、寫嘢、做政策研究等，好似佢現時搞緊智庫、做閒職，講嘢同搵人都方便啲。


即將卸任立法會主席嘅曾鈺成不時被追問參選意欲，之前笑稱「等吓先」；直到今年7月底，就話如果特首梁振英角逐連任，又無其他合適人選同佢競爭，就不排除出嚟參選「打破呢個悶局」。曾主席噚日好似又轉口風，到底最終佢會否參選，就要拭目以待。