參選撤資格 中出羊子按金拎得番

【明報專訊】立法會選舉告一段落，各候選人陸續向選管會申報選舉開支。參選新界西嘅中出羊子被取消參選資格，選管會話佢都拎得番5萬蚊選舉按金，但其他宣傳開支就一分錢都無喇。


中出羊子報名時已經以奇裝異服造型出現，並有「昭明公主」之稱。根據佢向選管會提供嘅申報，原來佢呢個出位古裝look，就需花1000蚊化妝、1500蚊拍造型照。雖然羊子參選政綱主打「香港獨立」，不過喺買嘢方面就唔使咁「港中區隔」，原來佢唔少街站物資、裝備都係淘寶大陸貨，例如「勾結外國勢力」海盜船長勾，就係喺天貓用15蚊人仔連運費送到香港。淘寶貨出名平，所以羊子嘅宣傳使費都算少，總共5000幾蚊。


另外，工程界今屆混戰，3人爭奪議席，為咗成功連任，經民聯盧偉國都好落力，使咗21萬幾蚊拉票。不過由盧偉國嘅申報都見到，佢出行不時以巴士、港鐵代步，算幾慳儉。