AC米蘭中國買家受質疑

【明報專訊】人人都知習大大有個足球強國夢，希望中國有朝一日可以捧到世界盃，雖然呢一日大家都唔知幾時先等到，不過中國足球要衝出世界仲有好多方法，例如收購海外班霸咁。近年中資企業買海外球會比比皆是，繼國際米蘭被中資蘇寧雲商集團收購近70%股權後，佢哋老對手AC米蘭上個月都宣布，同以中歐體育投資管理為代表嘅中國財團達成收購協議，將斥7.4億歐元（約64億港元）買下AC米蘭99.93%股權，並承諾3年內向球會投資3.5億歐元（約30.2億港元）。


之不過噚日外電彭博就話，中歐體育為證明自己有足夠財力進行收購，向AC米蘭出示一份江蘇銀行文件，證明佢哋戶口有8.52億元人民幣，據指份文件仲有江蘇銀行紅印封口，但係AC米蘭查證之下，發覺江蘇銀行根本冇發出過呢份文件云云。


目前雙方對事件都不願置評，但如果事件屬實，咁呢鋪真係國際大醜聞，事關足球強國未圓夢，弄虛作假就舉世聞名喇！

[小琴密語]