講完橫洲講武術 財爺寄語勇武者「上善若水」

【明報專訊】財政司長曾俊華噚日喺橫洲發展記者會上，講咗句「You always agree with your boss（你總會認同上司）」後，馬上就趕去浸大出席一個武術研討會，席間浸大校長錢大康開宗明義叫佢講吓「政治武術智慧，好似太極推手、移形換影咁」，但財爺似乎收起幽默，淨係話習武可以磨練耐性，又話武術融入社會學嘅層次太高，相信要教授們幫忙解答。


浸大噚日下晝5點舉行「中國傳統武術與現代社會研討會」，曾俊華獲邀擔任講者之一，佢喺政總出席3點半舉行嘅橫洲記者會後，亦準時趕到浸大。留學美國時曾練洪拳嘅財爺，提到自己名副其實係一個「竹升」，學功夫可以幫佢認識中國文化，又話當時喺海外嘅華僑，愛國心不下於國內人士。佢話，習武唔單止強身健體，仲可以「磨練我嘅意志同耐性」，亦令佢知道做人要謙卑，學識「天外有天，人外有人」呢個簡單道理。


錢大康致辭時開宗名義，叫財爺講吓武術嘅人生智慧、政治智慧，包括政治武術點樣「借力打力、隔山打牛」，不過，財爺嘅分享環節中只係提到「Be like water（上善若水）」，話水「打過來可以好柔弱，但又可以造成海嘯衝擊」，又寄語現時社會中主張勇武嘅人，思考一下上善若水嘅意義。