田北俊卸任大計 「玩，全部都係玩」

【明報專訊】立法會主席曾鈺成主持嘅商台節目《鈺成千里目》，過去一連三日搵咗自由黨榮譽主席田北俊做嘉賓，噚日一集，兩人就大談卸任立法會議員之後嘅大計。田少話，呢排仲忙緊處理立法會選舉嘅善後工作，好似協調不同黨派嘅人出選立法會主席等，但之後就有「好多大計，全部都係玩」，包括同3個孫仔、孫女去滑雪。


田少不時喺社交網站上載「抽水」帖文，早幾日仲將facebook嘅封面圖片改為一張滑雪相，側邊有一句「不羈放縱愛自由」，原來田少嘅卸任大計，都有計劃聖誕先同兩個外孫女去歐洲滑雪，出年1月再同孫仔去加拿大滑雪。田少話，呢個係黐住孫仔孫女嘅最好機會，令佢哋走唔出自己「手指罅」，因為無論住酒店、食嘢定玩都要一齊行動，「去Disney（迪士尼主題樂園）嘅話都唔知去咗邊！」


多年來任職立法會議員，田少話自己成日都要開會，玩樂時間唔夠多，早前又要忙住立法會選舉嘅宣傳工作，笑住話「好幾個禮拜都見唔到自己隻船」。年屆69歲嘅田少又特別提醒同年出生嘅曾主席注意身體健康，定時檢查身體「check吓啲零件」喎。