飲品紙盒年棄37億個 4酒店參與回收

【明報專訊】環團綠色力量估算香港每年棄置堆填區嘅紙包飲品盒多達43,000噸，即大概37億個，但香港缺乏回收設施，所以未做到回收再造。綠色力量就搞咗個回收計劃，現有4間酒店﹕美麗華酒店、皇家太平洋酒店、城市花園酒店及港島太平洋酒店參加。酒店餐廳員工收集飲品紙盒，先簡單清洗，再放到回收箱，由回收商每周回收一次，以作回收再造。


綠色力量助理高級教育及項目主任林詩淇話，參與計劃嘅酒店共有15間餐廳，佢哋廚房用嘅紙包飲品盒容量較大、數量多，例如牛奶盒、忌廉盒等，有助減省回收成本。物料會運到泰國回收廠，先抽出紙嘅部分製成再造紙，膠同鋁則經高壓處理，壓成建築材料，轉贈當地慈善團體送畀有需要嘅人。


另邊廂，中電噚日亦搞咗個「環保節能機構」嘉許禮，表揚有顯著節能表現嘅工商及社福機構，獲獎者包括一街市豬肉檔，肉檔將傳統肉檔用嘅鎢絲燈改為LED燈，結果慳咗電費，又話豬肉切割員，特別係女性，企喺檔口工作會舒服好多，更唔會照出雀斑咁話！