高永文係咁咳 扑咪要嗌cut

【明報專訊】一直鍾意畀傳媒「扑咪」嘅食物及衛生局長高永文，噚日遇到少少阻滯，講講吓嘢喉嚨痕，講極都講唔到落去，搞到要暫停扑咪。


高永文噚日同區議會開會討論清潔香港，之後就帶住平日較少露面嘅食環署長劉利群，同埋幫手推廣清潔香港嘅清潔龍阿德出場。高永文一如既往，見到記者就係咁講佢同區議會講過乜。


唔知係咪秋涼乾燥，高永文講咗唔夠一分鐘就開始吞口水，聲都變埋繼續講，但講多兩句真係頂唔順，咳咗幾聲，話要停一停，仲話真係喉嚨好痕，要叫人畀水佢飲。


雖然扑咪要暫停，但電視直播就無停，伴住局長嘅劉利群好識做，話頭先局長開會開咗兩個鐘，仲即刻攞住細隻版嘅清潔龍，請記者先同局長影相。高永文話自己唔係唔舒服，只係講得太多嘢喉嚨乾同痕，仲話如果傳媒直播緊，真係唔好意思。