寶蓮寺佛你跑 今年「佛」埋你太太

【明報專訊】寶蓮寺去年搞咗個慈善越野跑比賽「佛你跑」，今年11月5日捲土重來，大會仲作出「佛你太太跑」呼籲，希望鼓勵女性都可以養成跑步嘅好習慣。


今年賽事分8公里、6公里同2公里，途經昂坪同彌勒山，寶蓮寺「佛」完你跑，都有啲「甜頭」畀番咁多位選手嘅，就係可以免費享用寶蓮寺嘅齋菜，重可以免費乘搭360纜車或大嶼山巴士。


「佛你跑」大會見上屆賽事反應熱烈，今年將參賽名額由1000個增加至2000個；大會仲要選手叫埋太太一齊跑，作出「佛你太太跑」呼籲，噚日請嚟5個今年都會參賽嘅太太分享跑步心得，其中3人都係由「陪老公跑」到家自己去各地比賽。好似全職媽媽Elaine，就剛喺8月參加海外毅行賽，以28小時18分完成100公里賽，仲得到分齡50歲以上組別嘅冠軍，佢哋都希望更多太太可以一齊投入跑步運動。大家有興趣可喺網上報名，額滿即止。