告別灣仔 小額審裁處搬西九法院

【明報專訊】斥資逾27億元嘅深水埗西九龍法院大樓，今日開始有先頭部隊搬入去，就係原本喺灣仔法院大樓嘅小額錢債審裁處，司法機構話荃灣裁判法院、死因裁判法庭同淫褻物品審裁處亦會喺今年底至明年初陸續入伙。


荃灣法院原址畀社署改建

新西九法院大樓就梗係又靚又正啦，Emily聽法庭同事講，佢哋終於可以同殘舊污嘈到不堪嘅荃灣法院同嗰度個廁所講聲bye bye你條尾。不過，新大樓位置喺深水埗通州街501號，咁啱就喺長沙灣同南昌兩個港鐵站中間，兩頭唔到岸，法庭同事平日去採訪就要行多兩步。


講番小額錢債審裁處，佢哋一日審成百幾單案，家地方真係好唔夠用。司法機構發言人話，新嘅小額錢債審裁處會有12個法庭、12個會見室、16個會談室、8個登記室同一個登記處，亦會有新設嘅資訊中心向有意訴訟人士提供諮詢。


至於舊小額錢債審裁處，據了解會重置土地審裁處，荃灣法院位置就會畀番社署改建成社會福利設施。