議員下周揀位 青政爭坐頭排 功能界別泛民想要6連位

【明報專訊】新一屆立法會10月12月召開首次會議，立法會秘書處噚日向候任議員發出座位編配嘅通告，叫議員揀定座位。青年新政兩名候任議員梁頌恆同游蕙禎表明想坐議事廳頭排，但最終可能都要抽籤決定。


慣例人數最多黨派揀先

秘書處話，候任議員需要揀定議事廳同會議室1（即內務委員會和財委會等會議地方）嘅座位。候任議員會喺本月27號（下周二）出席揀位會議，落實座位位置，到時亦有可能需要抽籤決定。按慣例，人數最多嘅黨派可以優先揀位。


建制派議員座位安排估計唔會有大變，40名議員會照舊坐喺靠近政府官員嗰邊；非建制派會留喺面向主席台嘅右面。不過，今年非建制派多咗來自本土派、自決派等不同政治光譜嘅議員，所以各黨派都諗緊點坐，話晒個位一坐就4年嘛。


估計建制照舊坐近官員

候任建築、測量、都市規劃及園境界議員姚松炎話，幾個泛民功能組別議員組成嘅聯盟「專業議政」會坐埋一齊，希望會有「6個相連座位」，但對於坐第幾行就無特別要求。香港眾志羅冠聰噚日截稿前，就話仲同其他議員討論緊點坐。


公民黨郭家麒就話，座位對該黨而言並非最關心嘅事，指往年都會同泛民主派其他政黨先討論，但今年暫時都未傾。