有話說﹕子女玩手機碌爆卡 點算？

【明報專訊】上星期消委會公布，話有個9歲小童用家長嘅手機玩遊戲，喺毋須輸入密碼嘅情况下直接透過手機登記嘅信用卡付款，購買打機用嘅遊戲道具，結果家長收到過萬蚊帳單，真係嚇死人！其實現今小朋友拎父母手機玩都幾普遍，你去一轉茶餐廳或酒樓，十個細路有五個都係咁。不過大家成日話手機荼毒青少年同小朋友，其實大人咪又係一樣！搭港鐵個個低頭碌碌碌，隔籬坐住劉華都唔知啦！


了解沉迷原因 齊訂遊戲時間

父母自己玩手機，但完全唔畀仔女玩，又好似有啲離地。Mama都唔知點樣做係最適當，不如就問下輔導心理學家尹冠業（Edwin）點算好。首先，好多人都會擔心子女玩手機玩過火，但到底點先至真係上癮？Edwin話雖然喺精神病理上，未能診斷一個人玩手機到咩地步先算係精神病，但係家長可以留意仔女有冇以下呢幾個特徵﹕


1、只顧玩手機，對生活及其他活動失去興趣

2、即使知道自己不可以再玩，也不能抑制自己停低

3、逃避承認自己沉迷

Edwin曾經接觸過一個例子，一個12歲青少年花咗家長五萬幾蚊去買遊戲道具。「呢啲小朋友通常會講大話，話自己唔小心撳錯掣先會買咗，又否認自己沉迷，其實都係搵藉口。」


Edwin話家長最緊要識得點樣去管教仔女，所謂管教，係先教後管。「教唔係話要用說教方式，而係理解仔女點解會咁沉迷，例如係咪心理上不被滿足？因為九至十幾歲嘅青少年，如果交唔到朋友，或者生活、學業同能力上得唔到老師或朋友認同，就容易出現呢個情况。家長應該多啲同佢哋講正面說話，例如話好擔心佢哋，並正視返問題源頭。」


教完，就要管。管唔係透過懲罰或者唔畀佢哋玩就算，而係畀返個主動權小朋友，等佢同父母一齊訂時間表，例如每日幾時可以玩，玩幾耐等等，等佢學識管理返自己嘅時間。呢個方法又真係唔錯，可以避免同子女衝突，等Mama都介紹畀朋友試下先。