財爺見識中亞「一國兩制」

【明報專訊】財政司長曾俊華上星期率團去咗哈薩克斯坦訪問考察，香港人對呢個中亞大國嘅認識比較少，財爺話最難忘係參觀當地納紥爾巴耶夫大學（Nazarbayev University, NU）時，見到3名來自香港嘅學者，分別係Match、Brian和Professor Stice。財爺到訪呢間大學當然有原因，佢話國家主席習近平2013年訪問哈薩克斯坦，正正喺呢間大學宣布「一帶一路」發展宏圖大計。


財爺話NU成立短短6年，但有大量資源支持下，廣納國際人才同導師，好快就成為中亞地區嘅頂尖研究型學府。


財爺同30幾名商界及專業界代表去哈薩克斯坦，行程包括首都阿斯塔納（Astana）及最大城市阿拉木圖（Almaty）。佢話當地喺2017年舉行世博會，之後會喺原址建立阿斯塔納國際金融中心（Astana International Financial Centre, AIFC），又話AIFC將會一改哈國嘅規範，改以英語作為官式語言，亦會實行普通法，吸引外資及人才，財爺形容呢個儼如一個小規模嘅「一國兩制」。