宣傳物資用到盡 朱凱廸1橫額做4手袋

【明報專訊】立法會選舉曲終人散，但宣傳物資如果處理得唔好，隨時會造成浪費。


以環保見稱嘅候任立法會議員朱凱廸，佢嘅團隊成員呢排回收番宣傳橫額之後發揮創意，將橫額剪裁成手提袋同側揹吊袋，朱凱廸噚日喺facebook專頁上載相片，展示4個不同袋款，短短一日已經有超過8000個讚好，唔少網民都問有無得賣。


朱凱廸就同Emily講，諗緊會唔會賣呢啲環保袋或義賣。


考慮義賣環保袋

朱凱廸喺facebook以「攞走朱凱廸：Banner升級再造」為題貼相，話一幅宣傳橫額已經可以整到4個袋，形容係「用到盡」，有袋款印有數字「20」、即係朱凱廸嘅參選號碼，亦有袋款印上佢個名同雙眼。


有網民質疑佢當初如果唔印橫額，可能仲環保，但大部分網民都讚佢物盡其用，仲有人問有無得學整橫額袋。