話自己「100%香港親生仔」 何君堯訪中聯辦 「謝對港支持」

【明報專訊】候任立法會議員何君堯（圖）攞3萬幾票贏到新界西尾席，選後一句「多謝中聯辦」惹嚟唔少網民抨擊。不過何君堯繼續唔掩飾嘅作風，接受港台專訪中直認自己上星期到訪中聯辦，但係就否認去謝票，而係「多謝（中聯辦）咁多年來對香港的支持」。佢話係同部長傾偈，「講吓我未來喺立法會嘅工作等，呢個係好正常，係非常之恰當」。


外界叫何君堯做「西環契仔」，不過佢覺得呢個稱謂係抹黑、標籤，「以偏概全，專登抽一樣嘢出來講，放到無限大」。佢強調自己喺香港土生土長，「我係100%香港親生仔，點解你唔講呢樣嘢？」


批朱凱廸言論如「核彈」

言論一向惹火嘅佢最近又將矛頭指向打「官商鄉黑勾結」嘅候任議員朱凱廸，認為朱票王應該講清楚具體內容，例如「邊個官、邊個商」，認為候任議員講嘢要謹慎，叫朱凱廸拎出證據。佢仲話，「如果我何君堯講嘢係惹火，佢（朱凱廸）直情係核彈」。