「半新丁」楊岳橋升呢做黨魁

【明報專訊】新一屆立法會舊人引退，政黨領導層都有人事調動，好似擔任公民黨黨魁嘅梁家傑都退位讓賢，而Emily聞說岳少楊岳橋近期人氣旺，除咗得到梁粉娥姐「垂青」，喺黨內亦都得到支持，會接棒黨魁一職。


公民黨議員數目維持6個，黨魁嘅職務主要係協調立法會黨友嘅分工，仲要代表黨發言。家6個人之中，按資歷應該係郭家麒、毛孟靜同重返議會嘅陳淑莊行先，但郭醫生同毛姨姨各有個性同工作重點，而陳淑莊就鍾意自由自在，唔肯接手。


至於譚文豪係新丁梗係唔會做啦，剩底嘅只有郭榮鏗同岳少，而佢哋傳統係搵直選議員做黨魁，咁最後選擇就得番有半年議員經驗嘅岳少，難怪有黨友講笑話，有能力嘅人無興趣做，唯有要岳少捱吓義氣。


正常嚟講，做黨魁又唔係咩嘢咁複雜嘅事，但問題係公民黨過去都好自由，好似上次改革醫委會條例投票，佢哋6個人有3種唔同投票取態，畀人笑係三色雪糕，所以有需要整合，唔係隨時變成自由公民黨，岳少真係任重道遠。


涂謹申做白鴿召集人

至於有7個議員嘅民主黨，就一早推舉咗涂謹申做黨團召集人。


講開新一屆立法會，共有26個新丁，秘書處除咗安排雞精班畀佢哋，又安排時段教佢哋宣誓就職，仲請咗就嚟卸任主席嘅曾鈺成，喺10月4日上晝分享作為立法會主席同立法會議員嘅經驗。