議員偷閒 選戰後出埠充電

【明報專訊】經過激烈嘅立法會選戰後，立法會唔少人都趁住10月12號立法會開鑼前嘅空檔，去外地玩吓充電。謝偉俊就帶白姐姐同一班立法會同事，噚日出發去台北玩幾日，講明要去hea及食嘢，仲喺facebook上載飲酸梅湯津津有味嘅相。


陳淑莊《春光乍泄》拍攝地朝聖

謝偉俊一大班人去玩，但公民黨陳淑莊（Tanya）之前就孭起大背囊，走咗去阿根廷流浪，展開佢嘅春光乍泄之旅。佢喺阿根廷過生日，仲喺fb留言話「45歲關注組正式成立，多謝大家的祝賀」，而生日節目就係安排自己食餐勁，同埋去電影《春光乍泄》拍攝場地Bar Sur。Tanya提到電影裏面，何寶榮（張國榮）對戀人黎耀輝（梁朝偉）講「不如我哋從頭嚟過」，黎耀輝將對何寶榮嘅愛留喺阿根廷最南端、即係全世界最南端的城市Ushuaia。Tanya就話會去呢個浪漫嘅世界盡頭睇一睇。


至於新民黨葉劉淑儀，畀選舉後入中聯辦事件搞到幾煩，但都趁假期同囡囡去開心吓，佢噚日喺facebook報告行蹤，家喺西班牙馬德里巴拉哈斯機場，話西班牙歷史上曾出現過好多著名畫家，例如畢加索。佢話前日朝早抵達，就感受到呢股藝術氣氛。葉太大讚設計非常獨特，無論用色、結構都令人眼前一亮，係佢踏足過嘅機場中最靚嘅其中一個，而呢個機場原來都攞到過建築大獎。


經民聯梁美芬原來去咗英國過中秋，仲去咗倫敦唐人街嘅「梁山好漢」食店，話梁氏姓名配上「三合院火鍋」嘅招牌，配搭好有趣。


梁美芬嘅黨友林健鋒本來計劃中秋外遊，但機票搶手買唔到，所以推遲幾日出發，機票錢反而慳咗一大截。