景福主席去世 散戶發「死人財」

【明報專訊】小琴一向唔喜歡發「死人財」，不過世人就好現實，呢幾年賣盤傳聞不斷嘅老牌珠寶股景福（0280）噚日晏晝公布，主席楊秉堅與世長辭，享年73歲。不過公司股價下晝就爆升，有老友估計，可能因為一班炒友覺得上一代離世，賣盤機會大增啩。


憧憬賣盤 股價爆升

睇返股價，景福上晝基本上係零上落，但到主席離世公告出咗後，下晝股價嘭嘭聲炒上，收市升咗超過一成。查實呢兩年北水湧港買殼，景福都傳過幾次賣盤，就連已經今年初爆咗煲嘅恒發洋參（0911）前任老闆楊永仁都曾經係市場掃貨，據講佢都興致勃勃；不過最終都無單成事。


楊秉堅喺今年初先以72歲之齡接任景福主席，當時係因為佢弟弟楊秉樑需要投放更多時間喺其他事務。小琴喺呢度希望向佢嘅家人致以慰問。


[小琴密語]