曾鈺成提早「執包袱」

【明報專訊】今屆立法會任期月底結束，人氣高漲嘅立法會主席曾鈺成都要開始收拾，讓位畀新一任立法會主席。佢助理就將主席收拾辦公室嘅畫面直播出街，吸引唔少網民留言表達感謝，仲有人趁機問主席，「係咪準備進駐特首辦？」


但執嘢其實都好考功夫，Emily見到曾主席間房堆滿紙箱，枱面依然有一大堆文件。連主席都大嘆，自己「執嘢執到呆晒，枱面仲係立立亂」，又話由於一早訂咗機票聽日飛，所以要提早半個月交房畀秘書處。


搵到港大畢業時畫嘅漫畫

曾鈺成擔任立法會主席8年，間房都充滿唔少回憶，例如佢執嘢時，就搵到自己港大畢業無耐畫嘅一幅漫畫，回味一番之後，仲要特登影相分享畀朋友。睇怕按咁嘅速度，主席要清理晒成個辦公室都真係幾大工程。