新丁議員點歌愛懷舊

【明報專訊】噚日播出嘅港台節目《2016立法會選舉——議會新力量》，搵咗6個新丁議員分享工作大計同當選感受，新丁們仲點歌送畀聽眾（見表）。雖然話今屆議會多咗年輕新世代議員，不過新丁揀嘅歌好多都係「old school」。


譚文豪最潮 揀陳奕迅《無條件》

本身係飛機師嘅公民黨譚文豪就最潮，點咗陳奕迅嘅歌《無條件》，其中有句歌詞係「當潮流愛新鮮/當旁人愛標籤/幸得伴着你我/是窩心的自然」。譚文豪解釋話今次選舉有支持者無投票畀公民黨，大家要反思民主派嘅路線。


浩鼎選Oasis 阿廸心繫單車

喺英國留學嘅民建聯周浩鼎就送咗首讀書時好鍾意聽嘅歌畀議會同事，就係Oasis嘅Don't Look Back In Anger。周浩鼎話，寄語激進嘅朋友唔好成日都嬲，話用憤怒去處理問題只會加深矛盾喎。


朱凱廸就送咗英國經典樂隊Queen嘅Bicycle Race畀大家，希望自己喺議會可令單車更受重視，大家可以踏單車去所有想去嘅地方。


青年新政梁頌恆點咗陳小春《取消資格》，話有參選人被取消資格，呢個唔係民主選舉；新民黨容海恩就揀咗台灣歌手楊培安嘅《我相信》，話想令香港人燃點新希望；民主黨林卓廷點嘅係夏韶聲舊歌《交叉點》，希望大家面對挑戰時都唔會動搖。