回應選舉提問 董生：食咗飯未？

【明報專訊】立法會選舉曲終人散，新聞仍然不絕，多個主張港人自決嘅新人入局，選舉中首個棄選人周永勤話北京來人叫棄選，「票王」朱凱廸更面對生命威脅報警。近期不時就香港前景議政四方嘅全國政協副主席兼前特首董建華，又點解讀呢？


Emily同行家知道董生噚日以「團結香港基金」名義，約咗一班傳媒高層喺港麗酒店食飯，中午見佢到場就問佢會唔會幫手跟吓周永勤稱被恐嚇退選嘅事，董生就講咗句「大家好」；記者隨即問選舉結果係咪反映市民不滿特首梁振英，董生回頭講「對唔住」就入咗酒店，行家聽到一頭霧水。


等咗兩個幾鐘頭，見董生離開酒店，大家再問佢老人家點解讀自決派晉身立法會，呢次董生不斷反問番我哋﹕「食咗飯未啊？食咗飯未啊？」，記者答「未」之後，董生即刻話「對唔住啊，第日有機會詳細同你哋傾」，就上車離開。