D6升D8 唐智強接任環境局常秘

【明報專訊】立會選戰剛剛上映完，官場音樂椅又再轉動。政府噚日公布新一輪高層官員調動，勞工處長唐智強（圖）今個月19號出任環境局常任秘書長兼環境保護署長，接替服務政府逾37年退休嘅王倩儀，行政長官私人秘書陳嘉信下月6號亦會出任勞工處長。


公務員事務局長張雲正讚王倩儀任內成功落實多項環保措施，例如生產者責任計劃、興建轉廢為能設施等；話唐智強同陳嘉信都係資深政務官，有出色領導管理才能，相信會喺新崗位繼續為市民提供專業高效服務，帶領部門克服挑戰。


唐智強由原本首長級第6級（D6）升到D8，查實呢個位都幾難做。有官場中人拆解，未來幾年環境局會推行爭議政策，例如垃圾徵費，又要同兩電傾開放電力市場，可以話係燙手山芋。退休嘅王倩儀原來做呢個位剛好10年，據了解今個星期五係佢最後一個工作天，之後展開退休前休假。