玉娥思嫣達斌 齊齊無咗5萬蚊

【明報專訊】今屆立法會選舉由泛民、本土自決派及建制派三分天下，查實今次選戰風雲仲出現好多派別，例如公開話特首梁振英完美嘅陳玉娥、正義聯盟李偲嫣同愛港之聲高達斌等。三大愛港人士分別參選新界東同九龍東，最後齊齊落敗、得票率不足1%，5萬蚊選舉按金要被沒收。埋單計，今屆直選有31張名單、超區有3張名單被沒收選舉按金，總金額高達162.5萬元。


得票不足 34名單沒收選舉按金

根據選舉規例，地方選區候選人報名時要交5萬元、功能界別要交2.5萬元，候選人得票少過所屬選區或組別有效選票總和3%，按金會被沒收。以地區直選計，臨陣「棄選」嘅6人全部無一倖免，棄選超區嘅3名候選人得票率亦少過2%。而新界西有8張名單被沒收按金，成為上繳最多選區，達40萬元；交得最少嘅係九龍東，有4張名單；港島、九龍西同新界東，分別有6張、6張同7張名單被沒收按金。


馮檢基得票1.8萬「最唔抵」

最唔抵嘅可能係參選新界西嘅馮檢基，佢以近1.8萬票、得票率2.96%，同門檻「擦身而過」。新界東嘅鄭家富就好好彩，同樣有約1.8萬票，但得票率有3.08%，結果大步檻過。成個選舉最低票數嘅就係參選新界東嘅梁金成，最後得305票，得票率都係全場最低嘅0.05%。


Emily又計咗其他選舉之最，好似自動當選地產及建造界嘅經民聯石禮謙，就係最年長議員（71歲），佢話明「今屆最大年紀係我」，但認為議會好似社會縮影，要有老人家、有後生仔，重溝通都要重經驗咁話。