曾俊華再獲「習握手」 傾G20事情 唔係講選特首

【明報專訊】喺浙江杭州出席二十國集團（G20）峰會嘅財政司長曾俊華話，佢前晚有喺晚宴上同國家主席習近平傾偈，主要係感謝習主席邀請佢作為中國代表團嘅一員參加峰會，但唔肯透露習主席同佢講咗咩，「你們去問他（習近平）」。據Emily了解，最新「習握手」一幕原來喺前晚重演。


晚宴離場 習停低傾談

「習主席是東道主，當然見過他好多次」，曾俊華噚晚見傳媒時講，前晚晚宴時與習近平談話，但只傾G20嘅事，佢又恭喜習近平會議開得好成功，感謝習支持香港參加會議。據知，前晚習宴請各國元首及官員，財爺坐喺遠處一枱，同枱有財政部官員同其他國家官員，臨近尾聲，習主席離場途經財爺嘅一席時，停低主動同財爺傾談，仲同財爺握手，然後先離開。據知二人主要傾G20嘅事，唔係講特首選舉。


財爺噚日被問及對選舉嘅睇法時，話樂見多人出嚟投票，希望能盡快與新議員認識同建立工作關係。有記者問佢同本土派嘅溝通會唔會困難，佢回應話「不要太多擔憂」。對於選舉結果會否影響佢參選下任特首嘅想法，曾俊華就重申「如上」。


曾俊華話，自己喺G20峰會上見咗南非、加拿大及德國嘅財長，今日返港。