有話說﹕輕鬆面對新學期

【明報專訊】開咗學幾日，小朋友仲有無好似發緊夢咁呢？定係已經展現出最好狀態迎接新學年？如果你嘅小朋友仲係會唔記得帶嘢、記錯自己讀邊一班，唔緊要，其實每年開學頭一個月，好多學生都仲喺適應階段，特別係升上新學校嘅同學，例如幼稚園K1、小一學生同埋中一學生，會面對種種新挑戰，唔單止小朋友呀，連家長都係每日努力學習中。


Mama有唔少朋友嘅仔女今年升小一，老實講，由幼稚園上小學，無論返學時間同模式都同以前有好大分別，不過以Mama所知，好多小學其實都會為小一生安排好多適應活動，例如早喺暑假尾就有小一適應課堂，或者喺開學初期有特別嘅上堂安排等等。好似大角嘴天主教小學咁，Mama聽陳淑儀校長話，佢哋早於8月就有小一適應課，令小朋友9月踏入學校時，唔會對校園感到太陌生；而且開學期間，學校更會派四年級同學擔任關愛大使，以一對二嘅形式去照顧一年級同學，呢班學兄學姐會喺小息時陪學弟妹一齊玩，同佢哋介紹下學校環境。


唔止咁，陳校長仲話，開學最初兩星期，全校都只係上半日課，「因為小朋友來自唔同幼稚園，有啲以前可能返下晝班或者半日，如果一時間要上全日，對佢哋來講係幾難，所以我就有呢個安排」。不過陳校長就話，上年經驗係有啲學生開學時無事，變返上全日課時先喊，喺門口扯住爸媽唔畀佢哋走。「可能佢哋覺得太長時間見唔到父母，但我通常會叫家長唔好同佢哋喺校門糾纏，因為小朋友多數係心理上唔捨得，好多時我叫佢哋拜拜爸爸媽媽，轉頭拖佢哋入校門已經見佢哋笑晒！」原來好多情况係小朋友未必識得緊張，反而佢哋嘅家長就非常擔心！


家長比小朋友緊張

陳校長話其實大部分家長做得幾好，但小部分仍然會怕仔女唔識邊度排隊、唔知幾時去洗手間，或者唔記得帶個姓名牌使唔使即刻返屋企攞等等，但係其實好多學校老師都會有妥善安排，家長大可以放鬆面對；據知大角嘴天主教小學今年仲全面推行school app，家長可以隨時喺智能手機查閱通告，任何突發事例如接放學地點更改，家長都可以即時透過手機清楚知道，科技真係令我哋家做父母嘅輕鬆好多，唔使再驚唔記得呢樣嗰樣啦！