鍾國斌收call籲投對手楊詩傑

【明報專訊】除咗地區直選，其實唔少傳統功能組別嘅選情都好緊張，參選多個功能組別嘅自由黨，一直傳言係被打擊對象，紡織及製衣界嘅鍾國斌，噚日更加收到聲稱福建社團聯會嘅電話，但就呼籲叫佢投票畀佢嘅對手楊詩傑。


自稱「福建社團聯會」

鍾國斌話，噚日下午4點幾收到一個電話，雖然唔係電話錄音，但對方就好似錄音機咁催票，對方話自己係福建社團聯會嘅人，希望佢投票畀楊詩傑。鍾國斌話，福建社團咁大個組織都動員催票投畀對手，可謂絕不簡單，對其選情有一定影響。


佢形容今次自己係被「中西合璧夾擊」，「中」就係指特區政府（或者梁振英），「西」就係西環，即係中聯辦。


佢透露早兩個星期特首就約咗一班製衣界行業巨頭食飯，講咩相信大家都估到，而對手宣傳亦特別講自由黨同特首關係差，點可以幫到業界云云。