模擬票站投票 民建聯投訴被消失

【明報專訊】立法會選舉明天舉行，市民由朝早7點半起可以到所屬票站投票。選管會早前設立咗4個模擬投票站，畀市民預先熟習投票程序，不過有民建聯候選人噚日到大埔的模擬票站抗議，質疑新界東有22個候選人，但模擬選票上只有20個名單，要求當局澄清同更正，以免影響選情。


民建聯成員噚日去大埔社區中心嘅模擬投票站抗議，本身係新界東候選人陳克勤團隊嘅黃碧嬌話，票站內嘅模擬選票只有20個候選人、而俗稱超級區議會嘅區議會（第二）功能界別得8個選擇，但事實上新界東有22個候選人、超區就有9個候選人，擔心模擬選票會引起誤會，影響該區22號名單陳克勤、超區809號名單周浩鼎嘅選情。


除咗大埔社區中心，選管會由上周六開始到今日喺禮頓山社區會堂、油麻地梁顯利社區中心、屯門井財街社區會堂都設有模擬票站，暫時其餘票站都無收到投訴。另外，選民由聽日朝早7點半至晚上10點半，可以帶身分證明文件，去投票通知書指定嘅所屬票站投票。


選舉事務處回應話，4個模擬投票站開放畀全港選民參觀，主要目的係畀選民熟習投票程序、唔分選區。因為模擬選票要提早印製，所以印製個陣唔可以因應喺提名期之後先確實嘅候選人名單數目。