現「工聯夠票」貼紙 棠哥信唔係民記搞鬼

【明報專訊】仲有兩日就係選舉日，唔同參選隊伍已大打告急牌，包括各區選情都話危危乎嘅工聯會。不過噚日喺大坑一帶，就出現寫有「工聯會夠票喇 投民建聯啦」嘅貼紙，唔通工聯會真係夠晒票，仲幫友黨宣傳？當然唔係啦，工聯會榮譽會長鄭耀棠噚日都要親自澄清。


棠哥噚日見記者嚴正澄清事件，強調工聯會一直都係唔夠票，根本無貼過該款貼紙，「工聯一直叫緊好危險！」咁係邊個咁大整蠱？棠哥就話無人知係邊個做，但相信絕對唔會係民建聯做嘅，因為民建聯候選人喺民調排名比較高，唔需要工聯會過票。佢話表面上呢個貼紙係叫選民投畀「自己人」民建聯，但其實呢個做法變相將工聯嘅票過晒去民記度，其他差少少嘅候選人，此消彼長下就更易當選。


棠哥話工聯會已就事件報警，及向選管會投訴，又呼籲支持者唔好相信謠言，並狠批呢啲手法非常卑鄙惡毒，係選舉抹黑，影響選舉公平公正咁話。