IT界兩候選人廉署舉報差啲碰頭

【明報專訊】今屆立法會選舉IT界接連有種票疑雲，兩名IT界候選人莫乃光（Charles）同楊全盛（Eric）噚日先後到廉署舉報。Emily收到風，二人通知傳媒嘅到場時間只相差15分鐘，原本Eric約傳媒下晝4點3，佢班業界朋友準時現身，但Eric就遲遲未見人，最終約傳媒4點半嘅Charles反而先到場，佢班業界朋友又舉起《蘋果日報》之前指全屋突變IT人嘅報道。Charles話希望廉署嚴正徹查懷疑有不合資格而登記做咗IT界選民嘅個案，之前又有組織透過搞大型晚宴同贊助會費，招攬會員，令人擔心有「種票」情况。


Charles入咗廉署投訴後就見Eric到場，佢班業界朋友舉起《頭條日報》連日來話超過1500名教育界選民過檔IT界嘅報道。有記者問佢《明報》已經引述咗選舉事務處嘅官方數字，對比上屆都係得72名教育界過檔，Eric話無論係100定1000個過檔，如果有組織、有結構加入，都唔應該喺香港發生，他更點名質疑對手Charles幾個月前呼籲人加入個別組織做選民。