鄺俊宇式斷句 涂謹申宣傳幫市民「有句號」

【明報專訊】參選立法會「超級區議會」嘅民主黨鄺俊宇報稱係作家，佢嘅「鄺體」深入民心，特別係常用逗號嘅語句。唔知佢黨友涂謹申係咪有意模仿，噚日阿涂就形容處理求助個案係「有始 有終 有句號」。


阿涂噚日喺facebook上載一張宣傳相，相中嘅佢喺凌亂嘅工作間工作，阿涂話佢有個花名叫「二手議員」，因為部分個案就係其他議員直接叫事主搵阿涂；部分就係唔知咩原因，最終求助人搵阿涂幫手。佢形容舊嘅個案要跟進，新嘅繼續來，個案愈來愈多，但佢哋有自己一套跟進個案嘅態度﹕「據理力爭」、「有始 有終 有句號」。


盛智文挺周浩鼎

至於鄺俊宇就繼續sell溫情，喺fb上載短片，但今次主角係佢收養嘅狗狗，講佢點解收養流浪狗嘅故事，乘機帶出「照顧牠一輩子，是一個重要的承諾。不要棄養，請尊重動物生命」嘅信息。


至於建制派方面，民建聯周浩鼎近日已大打告急牌，陸續找來知名人士為佢助選拉票，噚日就有「蘭桂坊之父」盛智文。盛智文喺短片中大讚阿鼎年輕有為，又話民建聯擁有穩定香港嘅力量，佢形容阿鼎係香港「未來的希望」。候選人名單詳見附表。