陳健民談泛民配票：熱普城唔稀罕我哋一票

【明報專訊】星期日係立法會選舉投票日，相信唔少市民仲諗緊投票畀邊個，中大社會學系副教授、佔中發起人陳健民（KM）噚日講泛民配票，但就提醒大家「熱普城」（熱血公民、普羅政治學苑及城邦派）係非泛民，「他們有自己的教徒，不稀罕我們的一票」。


KM話，目前立法會選舉滾動民調抽樣數量不足，好難有科學基礎提咩配票建議。不過，KM覺得如果係單身嘅朋友，會勸佢哋投心儀候選人就算，唔好有太多計算；假如係「夫妻檔」朋友，會勸佢哋一票投畀心儀候選人，另一票就博一博，投畀民調中喺入局邊沿嘅民主派候選人。KM又話，如果真係唔信民調，便將一票投畀年輕人，「議會需要新思維」。


另一邊廂，普羅政治學苑嘅「教主」黃毓民，近日行勻5區為「熱普城」所有候選人拉票。出戰九龍西嘅黃毓民更表明要喺九龍西力爭兩席，實現真正「港人治港」。立法會選舉候選人名單見附表。