方國珊瞓街拉票 「輸咗唔再選」

【明報專訊】為咗選票可以去到幾盡？新界東獨立候選人方國珊（哪吒）決定瞓街拉票「盡地一鋪」力爭入議會。哪吒話今次係最後一次參選立法會，輸咗「唔會再選」，笑言選舉經費太貴，「姑婆本都使晒」。


根據民調數據，哪吒目前支持度反映佢有機會入局。佢噚日起直到星期六會舉行「展決心，瞓盡為民生」行動，會喺新東4區，包括大圍、大埔、粉嶺同將軍澳「瞓街」拉票。哪吒噚日喺大圍過第一晚，佢仲用facebook直播同大家分享政綱拉票。


新東選情激烈，其他候選人都各出其謀盡最後努力拉票。民主黨林卓廷今日會同10多個屋苑嘅小業主代表一齊開記者會，阿廷曾經幫過嘅反圍標小業主會現身撐林卓廷。


自由黨李梓敬同田北俊名單亦已經告急，李梓敬話選情嚴峻，呼籲大家集中票源支持佢哋。其他候選人名單見附表。