3機構准票站調查 包括成報同系公司 票站覆蓋率最高

【明報專訊】立法會換屆選舉周日舉行，選舉事務處噚日公布批准3個機構喺指定投票站外做調查，除咗大家較熟悉嘅「港大民意研究計劃」同「香港研究協會」，仲包括《成報》同系公司「成報報刊有限公司」。投票日共有571個一般投票站，「成報報刊有限公司」會喺超過一半（301個）票站做調查，覆蓋率仲高過兩個民研機構。研究協會喺277個站做調查，而港大民研就喺50個站做調查。


選舉事務處話，調查機構唔可以喺投票結束前，就個別候選人或名單嘅表現，發表具體評論、預測，或公布票站調查結果，選民是否參與票站調查亦純屬自願。


睇番18區票站調查分佈，「香港研究協會」會喺觀塘做最多票站調查，有30個咁多；「成報報刊有限公司」集中火力喺屯門做22個票站調查；而港大民研就較聚焦觀塘同沙田，兩區各有5個。