「懷石中菜」＋懷舊冰室 銀杏館轉戰太古油麻地

【明報專訊】長者社企銀杏館美孚分店，早前得唔到饒宗頤文化館續租，好彩有好多有心人幫手，終可以稍低於市價嘅租金，搬到太古同油麻地繼續經營。72歲銀杏館美孚分店店長Jessica係資深飲食從業員，話呢度建立嘅情，其他地方好難搵，最令佢唔捨得。


租金低於市價 租期可達8年

饒宗頤文化館唔再同銀杏館美孚分店續租，銀杏館9月30日最後一天營業，消息傳開後，好多有心人主動聯絡佢哋，有兩名業主更願意以低於市價嘅租金，租出太古基利路同油麻地甘肅街平安大廈嘅舖位，太古分店將以「懷石中菜」做主打，預計最快可以喺10月初開張；油麻地分店就變身懷舊冰室。


續聘近50長者員工

銀杏館行政總裁麥敏媚話，新店嘅租期可以去到7、8年，非常滿意，而近50名長者員工亦可自行決定去留，「只要佢哋願意，我哋都會繼續聘請」。


「開荒」到高朋滿座 店長不捨

72歲嘅銀杏館美孚分店店長Jessica，當年幫呢間分店「開荒」，佢話美孚分店嘅位置偏僻，開張初期饒宗頤文化館都未開幕，佢笑言當時嘅銀杏館都幾「陰森恐怖」，有時要親自到館外接客人摸黑上門，有時一晚只需要招呼一枱客人，當時花咗唔少時間同心力，叫更多人認識銀杏館美孚分店，所以睇到今日嘅美孚分店「高朋滿座」，內心好感動。


Jessica仲話畀Emily知，佢有多年喺酒店工作嘅經驗，但喺呢度同客人建立嘅情，喺其他地方搵唔到，亦最令佢唔捨得。佢話只要身體許可，都會繼續到新舖工作。