立選搜尋榜 岳橋居首浩鼎第二

【明報專訊】立法會選舉前夕，究竟邊啲候選人網上人氣較高？網上搜尋器Google噚日公布2016年立法會選舉關鍵字搜尋趨勢報告，記錄今年1月至8月28日嘅數據，各候選人中以出選新界東嘅楊岳橋排榜首，出選超區嘅周浩鼎排第2位。不過，值得留意嘅係，數據由今年初開始累計，而今年初舉行過立法會新東補選，當時候選人知名度會上升，所以論搜尋次數應會有着數。同樣地，曾參加新東補選嘅方國珊都高踞第4位。


上周發生自由黨新西候選人周永勤棄選事件，而周亦因而人氣急升，喺搜尋榜排第10位。如果只計算過去30日搜尋數據，港人對九龍西選區情况最關心，至於超級區議會方面，網民較多搜尋周浩鼎、鄺俊宇、涂謹申、梁耀忠和李慧琼嘅名字。


另外，社交媒體facebook亦趁9月4日有新搞作，話年滿18歲香港用戶將會喺「動態消息」上方收到信息，提醒大家當日可以投票，仲可以分享信息打吓卡，話畀人知自己已經投票！

候選人名單見附圖。