1日寄8封針對鄺俊宇電郵 港人講地﹕系統故障

【明報專訊】立法會選舉進入最後直路， Emily由前日朝早到噚日凌晨，唔夠24小時內收到挺梁網媒「港人講地」8封內容一模一樣嘅電郵，入面係一條港台選舉論壇短片連結，出選超級區議會嘅民主黨鄺俊宇，喺片中就港獨議題被同樣出選超區嘅民建聯周浩鼎同李慧琼圍攻，「港人講地」亦引述兩人批評鄺俊宇「無常識」同「玩火自焚」。


其實唔少有登記睇「港人講地」嘅政界人士都重複收到「港人講地」呢封電郵，加上周浩鼎同鄺俊宇嘅民調支持率一直咬得好緊，有機會爭超級區議會最後一席，即第5席，所以「港人講地」呢次重複發出針對鄺俊宇電郵嘅舉動引起一啲人猜測。


「港人講地」負責人回覆Emily時就解釋，向郵件發放商了解後，原來係郵件系統出現故障，令電郵被重複發送，郵件發放商收到故障報告後已經搶修，「港人講地」編輯室對造成讀者不便深表歉意。


超級區議會其他候選名單仲有﹕涂謹申、何啟明、陳琬琛、王國興、關永業、梁耀忠。