土炮飛機香港起飛遊世界

【明報專訊】首架正式在港裝嵌嘅小型飛機「香港起飛」（Inspiration），噚日朝早大約8點半正式喺香港國際機場出發，展開3個月環球飛行之旅，其間會飛越近25個國家，預料11月凱旋！

本地裝嵌8年 料3個月飛越25國

「香港起飛」由飛機師鄭楚衡聯同500幾個本地中學生、工程師同機師，花咗8年時間裝嵌而成。鄭楚衡噚日起飛前話，囡囡同飛機一樣，都已經8歲啦，自己呢段日子無咩時間陪屋企人，「欠佢哋好多好多好多……因為係用佢哋嘅時間，追我想要嘅嘢」。


「香港起飛」將會飛越近25個國家，其間會飛越太平洋，總飛行航程5.5萬公里，首站係菲律賓。飛機嘅facebook專頁噚日中午時分發帖，話機師鄭楚衡同飛機工程師達仁已飛到呂宋島附近，到達克拉克（Clark）。


特首梁振英噚日出席啟航儀式時話，希望今次嘅飛行旅程可以啟發香港嘅年輕人，可以啟發到佢哋「人生嘅飛行」。特首祝佢哋旅途順利、凱旋歸來。運輸及房屋局長張炳良亦有出席活動。


飛機成功啟航絕不容易，Emily都希望「香港起飛」可以帶住夢想環遊世界，完成創舉。