盈盈懷孕再證實食詐糊

【明報專訊】約兩星期前海洋公園話盈盈疑似有喜，當時樂園話有孕嘅機會係一半一半。樂園噚日公布壞消息，話盈盈懷孕迹象喺8月中開始減少，後來直情完全消失晒，證實未懷孕。


樂園：非意料之外

樂園就話呢個唔係意料之外嘅情况，因為大熊貓懷孕過程充滿變數，假孕都係不時發生。


家盈盈嘅活躍時間、食慾已經逐漸回復正常，荷爾蒙水平亦都回復基準水平。海洋公園話，經過園方同臥龍中國保護大熊貓研究中心嘅專家反覆檢視數據同討論後，確定盈盈未有懷孕。


盈盈嘅懷孕路可以話一波三折，盈盈去年底曾經成功懷孕，但最終「胎死腹中」，胎兒被母體子宮吸收。海洋公園今年再接再厲，4月安排盈盈同樂樂獨處「造B」但未見成功，其後再為盈盈做咗兩次人工授精。