上市商會邀港交所證監「論戰」

【明報專訊】上市監管架構諮詢，喺市場掀起一場寒戰，正反雙方隔空開火多時，嚟緊仲有直接駁火！話說7月底率先大力反對諮詢嘅香港上市公司商會，繼日前公開咗佢哋份諮詢回應文件之後，噚日仲話已經邀請咗港交所（0388）同證監會，喺9月7日下午3點，出席一個公開論壇，一齊探討一下份諮詢文件，交換下意見咁話。


商會嗰邊就講明會派商會主席、有「紅籌之父」之稱嘅梁伯韜，同埋副主席、人稱「創業板之父」嘅羅嘉瑞出席，而港交所就回覆本報係「冇回應」，證監會就直至截稿前都未有回覆。小琴覺得，對面出到「重量級人馬」，呢邊都要搵番啲有番咁上下江湖地位嘅人先應付到；不過呢個究竟係一個論壇、係一個擂台、定係一場鴻門宴，小琴真係睇唔透。


email: piano@mingpao.com

[小琴密語]