撤回網絡23條功勞屬誰 鍵盤戰線陳雲掀罵戰

【明報專訊】唔少政治人物會透過公布「成功爭取」，話畀市民知佢有乜政績。參選立法會新界東直選嘅陳雲（陳云根）最近就向選民寄出宣傳單張，當中竟然話自己就俗稱「網絡23條」嘅《版權（修訂）條例草案》發起白宮聯署，同埋派代表去美國領事館請願，成功逼政府撤回草案，不過佢呢個「成功爭取」，即時喺網上引起爭議。


相信大家都仲記得，立法會審議版權修訂條例時，民主派議員拉布，「鍵盤戰線」亦全力發功，最終政府知道無法闖關，收回條例。睇到陳雲咁樣「成功爭取」，「鍵盤戰線」前法律顧問蔡麒就好睇唔過眼，喺facebook貼出呢張單張，留言話：「有啲人真係唔知『醜』字點寫，仲要印係（喺）宣傳單張，你逼令？FF（網絡用語，意指幻想）夠未？」


蔡麒話無一個政黨敢唔提鍵盤戰線喺事件中嘅努力，質疑陳雲竟然歸功自己，仲爆粗叫陳「返青山啦！」有網民表示認同蔡麒，認為陳雲嘅做法過分，有人重提當時時任美國駐港澳總領事嘅夏千福都支持草案通過，反問陳雲話向美國爭取，究竟喺件事裏面有乜作用。Emily向陳雲了解，但係未獲回覆。


新界東候選名單見附圖。