林卓廷「選情嚴峻」 港鐵登廣告 阿涂：佢將比自己更出色

【明報專訊】立法會選舉進入直路，唔少候選人都話選情告急，出選新界東嘅民主黨林卓廷，再斥資約30萬元，喺港鐵沿線包括紅磡至上水站及調景嶺等站，推出約20塊「選情嚴峻」嘅大型燈箱廣告宣傳，今次仲搵嚟黨友涂謹申行孖咇。出選超區嘅阿涂仲撐阿廷，話相信「將來一定比阿涂做得更出色」，呼籲新東支持者投票畀佢哋兩個。


鄧家彪出動鄭耀棠擺街站

新東嘅工聯會鄧家彪都話選情嚴峻，所以呢幾日都要出動工聯會榮譽會長鄭耀棠，一連三日落區幫阿彪擺街站。


鄺俊宇fb講溫情故事

民主黨另一出選超區嘅鄺俊宇就繼續賣溫情，喺facebook分享故事，話10年前已有位坐輪椅哥哥街坊成日為佢打氣，話希望有日見到佢入立法會，直至佢真係參選後，呢位哥哥好開心對佢講：「講咗咁多年，終於等到喇！」立法會選舉候選名單見附圖。