Slide the city今重臨 水流加碼更好「瀡」

【明報專訊】舊年喺啟德郵輪碼頭舉行嘅Slide the City今年移師中環海濱活動空間，今日起一連6日舉行。今年水滑梯嘅斜度、高度同水流都加碼，等玩家「瀡」得盡興。


Slide the City舊年首度登陸香港，但有玩家向主辦單位反映話水滑梯唔夠斜、唔夠快。Slide the City大中華區代表陳家健話，今年水滑梯嘅高台高達10米，較去年7米台為高，水流較去年增加三成，有信心玩家會瀡得更快更盡興。今年呢個約150米長嘅斜滑道，只需30秒就瀡完。


舊年首日喺無通知下提早截龍，令部分參加「無限次體驗」嘅人只能玩到數次。主辦單位汲取經驗，今年門票改以時段劃分，玩家能於特定時段無限次玩水滑梯，各時段人數上限為800至1200，門票數量較舊年少兩成，大會希望透過限制人流縮短排隊時間。大會仲會喺每個時段結束前嘅20分鐘「截龍」，並會以廣播公布，避免溝通有誤會。


瀡滑梯票價由180元至580元不等，視乎時段與日期而定，各時段分別有3至4.5小時。天文台預計周五起嘅3日有雨，陳家健話微雨下活動繼續，但若有雷暴警告、紅黑暴雨警告或颱風，水滑梯會暫停，並會考慮向公眾退票。有別於舊年，今年場內增設多個遊玩設施，包括不另收費嘅人造沙灘，但沙灘面積只有20米乘15米，約四分三個籃球場，另外仲有收費嘅小型泡泡池同15個飲食攤位。