民主思路問重啟政改立場 5張名單覆

【明報專訊】派兩人參選立法會嘅民主思路，上星期以電郵邀請地區同功能組別140個候選人，就支唔支持重啟政改表態，不過截至噚日得5張名單覆咗，當中三張名單支持、兩張反對，民主思路無透露有邊個表態，只係話回覆嘅名單有建制同非建制。


兩候選人唔告急

今年立法會選舉話題圍繞下屆特首、港獨、拉布，點解民主思路會問重啟政改嘅立場呢？召集人湯家驊（Ronny）話，落區時見到選民關注政改，自己亦覺得港獨議題係傳媒而非選民焦點。講番選情，民主思路兩個候選人喺港大滾動民調支持率一直偏低，但Ronny強調佢哋唔會告急，話留意到好多受訪選民都未決定支持邊個，而民調亦唔係百分百準確。


民主思路廣邀傳媒出席噚日記者會，話有「重大政策」宣布。原來民主思路打算喺未來一年研究長者友善城市、強積金改革同回收產業，又以「452行動」為名，話今屆立法會點人數同流會浪費咗452小時，所以佢哋會喺呢3個範疇研究452小時。民主思路一直有做政策研究，但將未來研究時數同拉布及「重大政策」拉上關係，就真係估佢唔到。