陳茂波網上3個月3提維港海濱

【明報專訊】維港兩岸海濱係唔少港人休憩嘅好去處，發展局長陳茂波噚日接受政府新聞網訪問時話，隨住中環灣仔繞道建成，將會釋放大片海濱用地，可以構思引入唔同用途，包括研究喺銅鑼灣避風塘引入水上餐飲同舢舨服務，以及喺避風塘隔籬嘅前貨物裝卸區，加設浮動泳池、日光浴區等水上康樂設施。


Emily翻查資料，今次係陳茂波近3個月以嚟，第三次喺網上平台講開維港海濱呢個議題。


陳茂波話，政府過去幾年推出多個改善海濱空間嘅短期項目，包括中環海濱設有摩天輪，亦舉辦過嘉年華、美食節、音樂會等活動，「我哋覺得係應該短期裏面，能夠盡快做得到，畀啲市民用到，我哋能夠做幾多我哋就盡量做一啲」，期望可以塑造維港海濱係活潑有趣、交通暢達嘅好地方，令市民享用時感到自豪。當中舊年全面建成開放、由前公眾貨物裝卸區改建嘅觀塘海濱，全長約1公里，正係政府其中一項改善海濱嘅計劃。


負責設計嘅建築署高級建築師藍兆偉就話，觀塘海濱長廊以玻璃作圍欄，令海濱環境更通透，增加海面、天空同大自然嘅距離感。