網絡自由政綱 民主黨眾志青政獲「鑽石級」

【明報專訊】以爭取網絡自由為宗旨嘅組織「鍵盤戰線」，早前寫咗個九大原則嘅《網絡自由宣言》，佢哋仲話喺6月24號已經寄咗畀超過32個參政團體同獨立人士，游說佢哋將九大原則納入選舉政綱，然後7月18號再寄電子問卷畀佢哋，叫佢哋剔政綱中有無嗰九大原則。


鍵盤戰線噚日發表調查結果，話有18個參政團體覆咗佢哋，但除咗新民黨同自由黨，其他建制一律無覆。鍵戰話佢哋個調查係根據政黨回覆問卷同佢哋附上嘅政綱，睇吓佢哋有無落實網絡自由政策，鍵戰之後會就佢哋落實咗幾多項，分金銀銅獎，其中有齊9項、仲有「新穎」網絡政策嘅，會畀鑽石評級。


攞到鑽石級嘅就有民主黨、香港眾志同青年新政，不過Emily就問何謂「創新」先？再講吖，明明問卷都有問獨立人士，但結果又無提佢哋，咁會唔會唔公平呢？

而雖然政團回覆嘅問卷中，聲稱話政綱內會提出網絡自由政策，但點樣查證呢？鍵戰無正面回應，只係話個調查同選舉無關，旨在話畀大家知都有政黨開始關注網絡自由，都算好開始。